Жалал-Абаддагы кар көчкүдөн кийин 4 кишинин дайыны чыкпай жатат
14-февраль күнү саат 12:30 чамасында Балыкчы-Жалал-Абад альтернативдик унаа жолунунун болжолдуу 334-чакырымындагы Көк-Арт ашуусу жайгашкан тоннелдин түндүк тарабында кар көчкү түшкөн. Кар «Чайна Роуд» ишканасына тиешелүү Нива унаасын, 1 даана жүктөгүч жана 2 даана экскаваторду басып калып, 3 киши дайынсыз болууда. Бул тууралуу ӨКМден билдиришти.
Мындан тышкары, саат 17:30 чамасында аталган унаа жолдун 340-чакырымында дагы кар түшкөн. Натыйжада 2 унаа менен вагонду сайга сүрүп кеткен. Андан 3 адам жабыркап, бирөө дайынсыз болууда.
Куткаруу иштерине ӨКМдин Жалал-Абад облустук башкармалыгынын башчысы жетектеген ыкчам топ тартылган. 14-февраль күнү издөө-куткаруу жана тазалоо иш-чаралары жүргүзүлгөн. Бирок, аба-ырайына байланыштуу жана жолго кар көчкү түшкөндүгүнөн улам, коопсуздукту сактоо максатында иш-чаралар убактылуу токтотулган.
Ал эми жабыркаган 3 жаран куткаруучулар аркылуу Сузак районунун Октябрь айылындагы ооруканага жеткирилген. Учурда көчкү астында калган 4 жаранды издөө иш-чаралары уланууда.
