Япония Орусияга каршы жаңы санкцияларды жарыялоого камынууда
Япон бийлиги Орусияга каршы жаңы санкцияларды киргизет. Бул тууралуу «Киодо» агенттиги жазды.
Чектөөлөр россиялык көмүрдүн импортуна тиешелүү болот.
Бүгүн, 8-апрелде Япониянын премьер-министри Фумио Кисида жаңы санкцияларды жарыялай турган пресс-конференция саат 18:00дөн кийин (Киев убактысы боюнча 12:00) башталышы күтүлүүдө.
Басылманын маалыматына караганда жаңы санкциялар энергетика тармагына таасирин тийгизиши ыктымал. Тактап айтканда, Япония россиялык көмүрдүн импортун чектөөгө ниеттенүүдө.
Буга чейин Япониянын экономика, соода жана өнөр жай министри Коити Хагиуда бийлик Орусиядан ташылып жаткан көмүрдүн көлөмүн акырындык менен азайта турганын билдирген. 2021-жылы Япония Орусиядан жалпы импорттолгон көмүрдүн 13% алган.
Эске салсак, бейшемби күнү, 7-апрелде АКШнын Каржы министрлиги Россия Федерациясынын сегиз жаранына жана Орусиянын 30га жакын түзүмүнө каршы санкцияларды киргизгенин жарыялаган. Кремлдин Украинага каршы ачкан согушунан улам киргизилген жаңы санкциялар өзгөчө дүйнөнүн эң ири алмаз өндүрүүчүсү Alrosaга таасирин тийгизди.
