Талант Мамытов Валентина Матвиенко менен мигранттардын көйгөйлөрүн талкуулады
Жогорку Кеңештин төрагасы Талант Мамытов Орусиянын Федерация кеңешинин төрайымы Валентина Матвиенко менен жолугушту. Бул тууралуу Жогорку Кеңештин басма сөз кызматы билдирди.
Кыргыз-орус кызматташтыгынын күн тартибиндеги актуалдуу маселелер талкууланды. Валентина Матвиенко Кыргызстандын жетинчи чакырылыштагы Жогорку Кеңешинин делегациясынын биринчи расмий сапары Россия Федерациясынан башталганына кубанычта экенин белгиледи. Ал ошондой эле кыргыз тарапты конституциялык реформанын ийгиликтүү аякташы менен куттуктады.
Талант Мамытов эки өлкөнүн ортосунда толук кандуу өз ара түшүнүшүү бар экенин, бул жемиштүү кызматташууну өнүктүрүүгө мүмкүнчүлүк түзүп жатканын канааттануу менен белгиледи. Валентина Матвиенко Федерация Кеңешинде Россиянын ар кандай субъектилери бар экенин эске салып, аймактар аралык өнөктөштүктү активдүү өнүктүрүүнү сунуштады жана бул маселени парламенттер аралык комиссиянын жыйынынын күн тартибине киргизүүнү сунуштады.
Маданий-гуманитардык кызматташтыкты өнүктүрүүгө токтолуп, ал Кыргыз Республикасынын Конституциясынын жаңы редакциясында орус тилинин расмий макамын сактап калгандыгы үчүн кыргыз тарапка ыраазычылык билдирди.
Федерация Кеңешинин Төрагасы Кыргызстанда мамлекеттик тилди өнүктүрүү жана тил саясатын өркүндөтүү программасы улуттар аралык баарлашуунун тили катары кызматын улантып келе жаткан орус тилинин муктаждыктарын эске алуу менен ишке ашырылып жатканын кошумчалады.
Миграция тармагындагы кызматташуу маселелерине өзгөчө көңүл бурулду.
Төрага Орусиядагы кыргыздардын укуктук абалын жакшыртуу темасына токтолуп, үй-бүлөсүнө кошула албаган КР жарандарынын айрым категорияларын кара тизмеден чыгарууга көмөк көрсөтүүнү суранды.
Валентина Матвиенко кыргыз тараптын миграция жаатында тынчсыздануусу менен бөлүшүп, бул жааттагы көйгөйлөрдү биргелешип чечүүнү улантууну сунуштады.
