Кытайдан Кыргызстанга 1,5 млн доза Sinopharm вакцинасы келди

 Кытайдан Кыргызстанга 1,5 млн доза Sinopharm вакцинасы келди

COVID-19 каршы 1,5 млн доза Sinopharm вакцинасын Кытай Кыргызстанга гуманитардык жардам катары берди.

Кечээ, 14-декабрда “Манас” аэропортунда Саламаттык сактоо министрлигине жардамды тапшыруу аземи болуп өттү.

Вакцинаны тосуп алуу учурунда Министрлер кабинетинин төрагасынын орун басары Эдил Байсалов кыргызстандыктарга кайрылып, эмделүүгө чакырды.

«Биз келерки жылдын орто ченинде жаңы omicron штаммынын пайда болушун күтүүдөбүз. COVID-19 инфекциясынын күчөшү ыктымал жана ага чейин жарандар эмдөөдөн өтүүгө үлгүрүшү керек. Өнөкөт оорулардын болушу эмдөөгө каршы көрсөткүч болуп саналбайт. Тескерисинче, жарандардын бул категориясы тобокел топко кирет жана алар биринчи кезекте эмдөөдөн өтүшү керек», — деди Байсалов.

Бүгүн, 15-декабрда АКШ өкмөтү да Кыргызстанга Pfizer вакцинасынын 49 миң 140 дозасын берди. Вакцина COVAX программасынын алкагында берилген. Жүктү аэропорттон АКШнын Кыргызстандагы убактылуу өкүлү Соната Коултер, Саламаттыкты сактоо министри Алымкадыр Бейшеналиев тосуп алды.

Жанылыктар