ОшТВ телерадиокомпаниясы

Кол саноо менен бюлетендердин 65% дан ашыгы эсептелип бүттү

 Кол саноо менен бюлетендердин 65% дан ашыгы эсептелип бүттү

2-декабрь, саат 14:00гө карата Жогорку Кеңешке бирдиктүү шайлоо округу боюнча кол менен саналган бюллетендердин 64,31%  Боршайкомдун Маалыматтык шайлоо системасына киргизилди.

Ага ылайык, “Ата-Журт Кыргызстан” партиясы 15,89%, “Ишеним” 13,42%, “Ынтымак” партиясы 12,41%, “Альянс” 7,50%, “Ыйман Нуру” 6,75% жана “Бүтүн Кыргызстан” 6,42% добуш алып беш пайыздык босогодон өттү.

Борбордук шайлоо комиссиясынын төрайымы Нуржан Шайлдабекова парламенттик шайлоодогу бюллетендерди кол менен саноо бардык добушканаларда жыйынтыкталганын, аларды Маалыматтык шайлоо системасына киргизүү иштери жүрүп жатканын билдирген.

28-ноябрь күнү добуш берүү аягына чыккан учурда Борбордук шайлоо комиссиясынын (БШК) Маалыматтык шайлоо системасы бир өчүп-күйүп, жыйынтыкта башаламандык жаралган. Бир катар партиялар жана жарандык коомдун өкүлдөрү муну “көз боёмочулук” деп, шайлоону жокко чыгарууну талап кылууда.

Боршайкомдун техникалык адиси добуш берүүнүн жыйынтыгы боюнча автоматтык эсептөөчү урналардан түшкөн маалыматтарды сайтка чыгарууда талапкерлер алган добуш партияга кошулуп калганын айтты.

Президент Садыр Жапаров, Борбордук шайлоо комиссиясы жана Улуттук коопсуздук комитети  система техникалык адистердин катасынан улам бузулганын, ал шайлоо жыйынтыгына таасир этпегенин билдирип жатышат.

Жанылыктар