Кадамжайда тамакка ууланган беш адам ооруканага түштү

 Кадамжайда тамакка ууланган беш адам ооруканага түштү

Баткен облусунун Кадамжай районунда беш адам тамак-ашка ууланды. Бул тууралуу Саламаттык сактоо министрлигинен билдиришти.

Билдирүүгө караганда, жабырлануучулар 21-ноябрда саат 13:00дөр чамасында тамакка ууланып, кийинки күнү медициналык жардам алууга кайрылган. Бейтаптар Кадамжай райондук жалпы дарыгерлер практикалык борборунун жандандыруу бөлүмүнө жаткырылган.

“Үч жабырлануучунун абалы өтө оор деп бааланууда, жасалма дем алдыруучу аппаратта жатышат. Экөөнүн абалы оор. Учурда бардык керектүү дарылануудан өтүшүүдө. Бардык жабырлануучулардан лабораториялык изилдөө үчүн клиникалык материалдар алынды”, – деп айтылат маалыматта.

Алдын ала эпидемиологиялык иликтөө иштеринин жүрүшүндө маалым болгондой, жогоруда аталган жабырлануучулардын бардыгы 21-ноябрда саат 13:00дө жумуш ордунда түшкү тамактануу учурунда үй шартында жасалган жашылча консервалары менен тамактанышкан.

Белгилесек, 2022-жылдын 10 айында республикада тамак-аштан уулануунун 100 учуру катталып, 437 адам жабыркаган, анын ичинен ботулизмдин 25 учурунда 34 адам жабыркаган. Акыркы эки жумада эле ботулизм оорусунун оор түрү менен эки учур катталып, 7 адам жабыркады.

Нуржамал Баргыбаева

https://oshtv.kg/

Жанылыктар