Интернет аркылуу баңгизат сатып жүргөн жарандар кармалды
Америкадан келген баңгизатты интернет аркылуу сатып жүргөн жарандар кармалды. Бул туурасында ички иштер министрлигинен билдиришти.
Белгилүү болгондой, кылмышка шектүү И.А. менен А.А. 2022-жылдын ортосунан баштап Telegram мессенджери аркылуу бангизаттарды саткан интернет-дүкөндүн уюштуруучулары экендиги аныкталган. Бул интернет-дүкөндүн 377 активдүү катталуучусу бар болгон.
“Сатып алуучулар тарабынан төлөм акылары ар кандай электрондук капчыктар аркылуу криптовалюта түрүндө жүргүзүлүп келген. Бул баңгизаттардын партиясынын орто эсеп менен баасы 1 килограмм үчүн 30 000 АКШ доллары турат. Баңгизаттарды Кыргызстанга ташып келүү эл аралык почта компаниялары аркылуу жүргүзүлгөн”,-деп айтылат маалыматта.
Тинтүү учурунда колдонууга даяр болгон баңгизаттардын бир бөлүгү, ошондой эле аларды сактоону, жашырууну андан ары ишке ашыруу үчүн идиштер табылган. Алынган баңгизаттардын жалпы салмагы 2 килограмм 099 граммды түздү.
Кармалган жарандар Бишкек шаарындагы №1 тергөө абагына 2 айга камалды. Учурда бул кылмышка тиешеси бар башка адамдарды аныктоо боюнча мындан аркы ыкчам-тергөө иш-чаралары жүргүзүлүүдө.
