“Бишкекжарык” ишканасында 74 млн сомдук жетишпестик аныкталды

 “Бишкекжарык” ишканасында 74 млн сомдук жетишпестик аныкталды

Бишкек шаарынын мэриясына караштуу «Бишкекжарык» муниципалдык ишканасында (МИ) жалпы суммасы 74 млн. 28 миң сомдук товардык-материалдык запастардын (ТМЗ) жетишпестиги аныкталды. 

Башкы прокуратуранын басма сөз кызматынан билдиргендей, «Бишкекжарык» МИнин жетекчилиги жана жооптуу кызмат адамдары, өз кызмат абалдарын кыянаттык менен кызматтын кызыкчылыктарына каршы пайдаланышып, Кыргыз Республикасынын бухгалтердик эсеп жөнүндө мыйзамдарынын талаптарын одоно түрдө бузуу менен, 2020-2022-жылдар аралыгында ишкананын товардык-материалдык запастарынын эсебин жана алардын кыймылын өз убагында жүргүзүүнү атайылап камсыз кылышкан эмес.

Мындан сырткары, ишкананын кампасынан жооптуу кызматкерлерге ар кандай түрдөгү товарлар эч кандай негизсиз, тастыктоочу документтери жок эле, алардын жоопкерчилигинде ири өлчөмдөгү калдыктары болгондугуна карабастан, алар боюнча аткарылган иштердин актыларын албай туруп, эсептен чыгарбастан жана көзөмөлсүз берилип келген. Натыйжада, жалпы суммасы 74 млн. 028 миң сомдук ТМЗнын жетишпестигине (уурдоо же жоготуу жолу менен) жол берилип, өзгөчө ири өлчөмдөгү материалдык зыян келтирилген.

Текшерүүнүн жыйынтыгы менен Бишкек шаардык прокуратурасы тарабынан Кылмыш-жаза кодексинин 337-беренеси (“Кызмат абалын кыянаттык менен пайдалануу”) жана 210-беренеси (Ишенип берилген мүлктү ыйгарып алуу же коротуу) менен эки кылмыш иши козголуп, тергөө амалдары башталды.

Жанылыктар