Жапаров Бишкектеги жугуштуу оорулар ооруканасындагы «кызыл зонага» барды.

0
253

Бүгүн, 15-апрелде Садыр Жапаров Бишкек шаарындагы Республикалык клиникалык жугуштуу оорулар ооруканасындагы «кызыл зонага» барды. Бул тууралуу президенттин аппаратынын маалыматтык саясат бөлүмү билдирет.

Жугуштуу оорулар ооруканасынын башкы дарыгери Гүлжигит Аалиев учурда 354 бейтап дарыланып жатканын, алардын 14ү өтө оор абалда, 144ү оор абалда экенин маалымдады.

Ал эми Саламаттык сактоо жана социалдык өнүктүрүү министри Алымкадыр Бейшеналиев өлкө аймагында коронавирус инфекциясынын жайылышына каршы көрүлүп жаткан чараларга токтолду.

Коронавирус инфекциясы пандемиясынын үчүнчү толкунуна даярдануу алкагында республиканын бардык медициналык мекемелеринде дары-дармектердин жетиштүү кору бар экендигин белгиледи.

Мындан сырткары, бөлүнгөн 200 миллион сом керектүү дары-дармектерди жана жеке коргонуу каражаттарын сатып алууга жумшалат, ошондой эле коронавирустан дарыланып чыккан учурларга 157 миллион сом каралган.

Мамлекет башчысы «Кызыл зонада» бейтаптардын, анын ичинде реанимация бөлүмүндөгү абалы өтө оор болгондордун саламаттыгынан жана дарылоо шарттарынан кабар алды.

«Кызыл зонадан» чыккандан кийин Садыр Жапаров медицина кызматкерлери менен баарлашып, алардын көйгөйлөрүнө кызыкты.

Ал учурда өлкө жетекчилиги медицина кызматкерлеринин эмгек шарттарын жакшыртуу боюнча иш алып барып жаткандыгын, атап айтканда, Үй-бүлөлүк дарыгерлер борборунун кызматкерлеринин эмгек акысы жогорулатылгандыгын, башка категориядагы дарыгерлердин эмгек акыларын көтөрүү пландаштырылып жатканын баса белгиледи.

Ошондой эле, өзгөчө кооптуу шарттарда иштеп, күн сайын өлкө жарандарынын ден-соолугу үчүн өз өмүрлөрүн тобокелге салып жаткан медицина кызматкерлерине талбаган эмгеги үчүн ыраазычылык билдирди.