Садыр Жапаров Түштүк Кореянын Улуттук жыйынынын төрагасы Пак Бён Сок менен жолукту

0
120

Бүгүн, 5-апрелде президент Садыр Жапаров бүгүн, Корея Республикасынын Улуттук Ассамблеясынын төрагасы Пак Бён Сок менен жолугушту. Бул тууралуу президенттин аппаратынын маалыматтык саясат бөлүмү билдирди.

Жапаров Кыргызстан «Борбор Азия-Корея Республикасы» кызматташтык форумуна чоң маани берерин жана анын алкагында биргелешкен долбоорлорду жүзөгө ашырууга кызыкдар экендигин баса белгиледи.

Ошондой эле ал Кыргызстан үчүн да, Түштүк Корея үчүн дагы келечектүү болгон өлкөлөр ортосундагы соода-экономикалык кызматташуунун чоң потенциалы бар экенин белгиледи. Ал эки өлкөнүн Өкмөттөрүнө бул багытта тыгыз кызматташуга чакырып, тараптардын биргелешкен аракеттери менен соода жүгүртүүнүн көлөмүн көбөйтүүгө мүмкүнчүлүк түзүлөрүнө ишенимин билдирди.

«Бул максатта биз өлкөдө саясий жана социалдык-экономикалык өзгөрүүлөрдү жүргүзүп жатабыз, анын ичинде чет элдик инвесторлорго зарыл болгон кепилдиктерди берүүгө, ачык экономикага, либералдык соодага, валюта режимине жана ыңгайлуу салык базасына багытталган өзгөрүүлөр бар» — деди Садыр Жапаров.

Мамлекет башчысы шаарларды жана аймактарды өнүктүрүү, гидроэнергетика, тоо-кен жана текстиль тармагы, өнөр жай, транспорт чөйрөлөрү, туристтик объектилерди, аэропортторду куруу жана башка маанилүү тармактардагы кызматташтыкты арттыруу максатында кореялык ишкерлердин Кыргызстанда болушуна кызыкдар экендигин билдирди.

Президент билим берүү чөйрөсүндө эки тараптуу кызматташууну кеңейтүүгө кызыкдар экенин белгилеп, Кыргызстандын студенттери үчүн стипендиялык билим берүү программаларынын квоталарын көбөйтүүнү студенттер жана окутуучулар менен алмашуу программаларын ишке ашырууну карап көрүүнү өтүндү.

Өз кезегинде Корея Республикасынын Улуттук Ассамблеясынын төрагасы Пак Бён Сок корей тарап ар тараптуу кызматташууга жана Кыргызстандын алдыга карай өнүгүүсүнө активдүү катышууну кааларын жана ага даярдыгын баса белгиледи.

Төрага кыргыз тараптын билим берүү жана курулуш жаатында кызматташуу боюнча көтөргөн демилгелерин кубаттап, алардын эки тараптуу алакаларды кеңейтүүдөгү ролу зор экенин белгиледи.

Ал коронавирус пандемиясынын кесепетинен улам токтоп турган башка чөйрөлөрдөгү кызматташууларды да тереңдетүүгө даярдыгын билдирди.

«Илдет менен күрөшүүдө сизге ийгилик каалайм. Биз мындан ары да бул багытта кызматташууга даярбыз. Кыргызстан бизди кызматташуу жаатында кызыктырат. Жаратылышы бай жана туризмди өнүктүрүүгө бардык шарттар бар. Биз өз ара кызматташууну тереңдетүүгө даярбыз», — деп белгиледи төрага Пак Бён Сок.

Ошондой эле президент Садыр Жапаров Түштүк Корея менен мындан ары да ар тараптуу жана өз ара пайдалуу кызматташууга даярдыгын жана ачык экенин билдирди.