8-марттан тарта мас абалында рулга отургандар үч жылга чейин унаа башкаруу укугунан ажыратылат

2023-жылдын 8-мартынан тарта мас абалында унаа башкарган айдоочулар бир жылдан үч жылга чейин унаа башкаруу укугунан ажыратылат. Бул туурасында Жол кыймылынын коопсуздугун камсыз кылган башкы башкармалыктан билдиришти.

Жаңы эрежеге ылайык, мас абалында унаа башкарган айдоочулар унаа башкаруу укугунан бир жылдык мөөнөткө ажыратылат. Буга чейин 17 миң 500 сом өлчөмүндө айып салынып же коомдук жумуштарга тартылып келишкен.

Ал эми унаа башкарууга таптакыр укугу жок жарандардын мас абалында унаа башкаруусуна буга чейин 15 миң сом өлчөмүндө айып салынып келсе, эми мындан ары үч суткага камакка алынат.

Мас айдоочу өзүнүн спирт ичимдигин ичкендигин текшертүүдөн баш тарткан учурда буга чейин 17 миң 500 сом айып салынып келген, мындан ары айдоочу үч суткага жана айдоого укугу жок айдоочу 5 суткага камалат. Ал эми айдоочунун спирт ичимдигин ичкендиги аныкталса бир жылга унаа башкаруу укугунан ажыратылмакчы.

“Буга чейин айдоочу мас абалында жол кырсыгына кабылып, башка адамдардын саламаттыгына этиятсыздыктан залал келтирип, бирок аракетинде кылмыштын курамы жок болгон учурда 20 миң айып салынып же буш суткага чейин камалса, мындан ары айдоого укугу жок айдоочу жети суткага камакка алынып, ал эми эми айдоочу бир жылга унаа башкаруу укугунан ажыратылат”, – деп айтылат маалыматта.

Эгерде айдоочу жаза мөөнөтү бүткөндөн кийин кайрадан мас абалында унаа башкарып же мас абалында жол кырсыгына кабылса, анда автоунаасын убактылуу алып коюу менен үч жылдык мөөнөткөн унаа башкаруу укугунан ажыратылат.