Өзгөндө электр тармактары ишканасынын кызматкери пара менен кармалды
Сүрөт интернеттен алынды
Ош облусунун Өзгөн районунда электр тармактары ишканасынын кызматкери пара алып жаткан жеринен кармалды. Бул тууралуу башкы прокуротуранын басма сөз кызматынан билдирди.
Маалыматка ылайык, Өзгөндүн Кара-Дыйкан айылынын тургуну прокуратурага арыз менен кайрылып, райондук электр тармактары ишканасынын (РЭС) кызматкерлери электр энергиясын пайдалануу эрежелерин бузгандыгы үчүн негизсиз акт түзүшүп, укук бузуу боюнча жазадан бошотуу үчүн пара талап кылып жатышкандыктарын билдирген.
Жүргүзүлгөн ыкчам-тергөө аракеттеринин жыйынтыгында райондук электр тармактары ишканасынын кызматкери Р.А.Т. арыз ээси Н.С. аттуу жарандан опузалап талап кылган акча каражатын алып жаткан жеринен кармалып, Өзгөн райондук ИИБнүн убактылуу кармоочу жайына киргизилди.
Бул факты боюнча райондук прокуратура тарабынан Кылмыш-жаза кодексинин 343-беренеси (“Опузалап пара алуу) менен кылмыш иш козголгон.
Учурда тергөө амалдары жүргүзүлүүдө.
